مفتی عبدالقوی ذہنی مریض قرار، گھر والوں نے موبائل فون بھی ضبط کرلیا

مشہور عالم دین مفتی عبدالقوی کی میڈیکل رپورٹ سے انکشاف ہوا ہے کہ عبدالقوی ذہنی مریض ہیں، جس کے بعد ان کے اہلخانہ نے ان سے مفتی کا ٹائٹل واپس لےکر ان کا موبائل فون بھی ضبط کرلیا ہے۔

مفتی عبد القوی کے چچا عبدالواحد ندیم نے پریس کانفرنس کرتے ہوئے کہا کہ آج کے بعد ہم عبدالقوی کہہ سکتے ہیں، مفتی ہمارے دادا خواجہ عبید اللہ صاحب تھے، پھر اس کے بعد خواجہ عبد الرحمان صاحب تھے، پھر خواجہ عبدالعلیم صاحب تھے اور ان کے بعد عبدالقدوس صاحب تھے، پھر عبدالقادر کے بعد عبدالقوی کے سر پر ٹوپی پہنائی گئی ۔

انہوں نے کہا کہ اسی لیے انہیں مفتی کہا جاتا تھا، مگر چونکہ اپنی خراب دماغی حالت کی وجہ سے انہوں نے اسے بہت داغدار کردیا ہے اس لیے ہمارے خاندانی اصولوں کے مطابق وہ اس لفظ کے حقدار نہیں ہیں۔

پریس کانفرنس سے خطاب کرتے ہوئے عبدالقوی کے چچا کا کہنا تھا کہ عبدالقوی ذہنی طور پر بیمار ہیں، ان کا علاج ہورہا ہے، ان کا موبائل فون بھی ضبط کرچکے ہیں۔

عبدالقوی کے ذاتی معالج حافظ عبدالکبیر کا اس حوالے سے کہنا تھا کہ عبدالقوی کی سوچ ان کے قابو میں نہیں رہی ہے، لہذا انہیں طبیعت کی بہتری تک گھر میں آئیسولیشن میں رکھنے کی تجویز دی ہے، اس دوران کوشش کی جائے گی کہ انہیں عوامی اجتماعات سے دور رکھا جائے۔