لاہور، گاڑی کے کاغذات مانگنے پر شہری نے گاڑی ٹریفک وارڈن پر چڑھا دی

لاہور میں واقع جیل روڈ پر ڈیوٹی پر کھڑے ٹریفک وارڈن نے گاڑی پر کالے شیشے لگانے کے باعث شہری کو روکا اور کاغذات مانگے جس پر شہری طیش میں آ گیا اور کاغذات دکھانے کی بجائے گاڑی ٹریفک وارڈن پر چڑھا دی۔

واقعہ کی سی سی ٹی وی فوٹیج سامنے آنے پر پتہ چلا ہے کہ یہ واقعہ 20 نومبر کی دوپہر 3بج کر 48 منٹ پر پیش آیا جس میں ٹریفک وارڈن نے گاڑی کو کالے شیشے لگانے کے جرم میں روکا۔ وارڈن نے شہری سے گاڑی کے کاغذات مانگے جس پر بگڑا رئیس طیش میں آ گیا اور ٹریفک وارڈن کی جان کی پرواہ کیے بغیر گاڑی اس پر چڑھا دی۔

لاہور میں وارڈن کو گاڑی مار کر بونٹ پر گرانے کا مقدمہ درج #Lahore #GNN #GNNupdates pic.twitter.com/VqksDvqLzi

— GNN (@gnnhdofficial) November 28, 2020

سی سی ٹی وی فوٹیج میں دیکھا جا سکتا ہے کہ ٹریفک وارڈن جان بچانے کے لیے گاڑی کے بونٹ پر کود گیا مگر ڈرائیور نے گاڑی روکنے کی بجائے تیز رفتاری کے ساتھ آگے بڑھانے کے بعد سڑک پر زگ زیگ چلانے لگا جس سے ٹریفک وارڈن کچھ دور جا کر گرنے سے زخمی ہو گیا۔

لاہور: قانون کی خلاف ورزی کرنیوالا شہری روکنے پر برہم، شہری نے گاڑی ٹریفک وارڈن پر چڑھا دی، وارڈن گاڑی کے بونٹ پر خود کو بچانے کی کوشش کرتا رہا#Aajnews #Aajupdates #Aajexculsive pic.twitter.com/kYrwg9sMKq

— Aaj News (@aaj_urdu) November 28, 2020

نجی ٹی وی چینل کے مطابق تھانہ شادمان میں واقعہ کا مقامہ درج کر لیا گیا ہے جس میں ٹریفک وارڈن پر قاتلانہ حملے سمیت مختلف دفعات شامل کر لی گئیں ہیں۔

ابتدائی تفصیلات کے مطابق سی سی ٹی وی فوٹیج کی مدد سے گاڑی کا نمبر تو مل گیا ہے مگر تاحال گاڑی کو نہیں پکڑا جا سکا۔