پاکستان میں 7 دن کی قلیل مدت میں دو منزلہ گھر تعمیر کرنے کی ٹیکنالوجی متعارف

اسلام آباد کے انجینئر نے پاکستان میں تعمیراتی شعبے میں ایک حیرت انگیز ٹیکنالوجی متعارف کروا دی ہے، جس کی مدد سے صرف 7 دن کی قلیل مدت میں ساڑھے تین مرلے میں دو منزلہ مکمل گھر تعمیر کیا جا سکتا ہے جو قیمت میں بھی دوسرے گھروں کے مقابلے میں انتہائی سستا ہے۔

خبر رساں ذرائع کی رپورٹ کے مطابق کورین ٹیکنالوجی کا استعمال کر کے ساڑھے تین مرلے میں نہایت ہی پائیدار دومنزلہ گھر تعمیر کیا جا سکتا ہے، کورین ٹیکنالوجی سے بنے اس گھر میں ضروریات زندگی کی تمام سہولیات میسر ہیں، یہاں پر حیران کر دینے والی بات یہ ہے کہ اس پورے آرائشی گھر کی قیمت صرف 28 لاکھ روپے رکھی گئی ہے۔

ساڑھے تین منزلہ گھر کی تعمیر میں صرف سات دن لگتے ہیں، جس میں ہر منزل پر دو کشادہ بیڈرومز، کشادہ کچن، دو واش رومز اور ایک اسٹور روم بنایا گیا ہے، انجینئر نے گھر کی تعمیر کے حوالے سے دعوی کیا ہے کہ گھر زلزلہ پروف ہے اور اس کی وارنٹی 50 سال ہے۔

انجینئر کا گھر کی تعمیر کے حوالے سے کہنا تھا کہ یہ گھر انرجی ایفیشنٹ ہے اس میں پیور پولی ایتھوسن ہے، جو ایک عام گھر کے مقابلے میں تین درجے زیادہ بہترین آئسولیشن فراہم کرتی ہے۔

انجینئر کا اس حوالے سے مزید کہنا تھا کہ ہماری خواہش ہے کہ ہماری ٹیکنالوجی کے مطابق یہاں پر پلانٹس لگیں اور ہم ایک پلانٹ کی مدد سے 18 ہزار گھر سالانہ کی بنیاد پر تعمیر کر سکتے ہیں، ہم پاکستان کے ہر بڑے شہر میں اس طرح کا پلانٹ لگانا چاہ رہے ہیں۔

انجینئر کا اپنے شاہکار کے حوالے سے مزید بتانا تھا کہ ہمارا اس طرح کے گھروں کی تعمیر کے پہلے فیز میں 50 ہزار گھر بنانے کا منصوبہ ہے، انہوں نے کہا کہ اگر حکومت پاکستان ہماری مدد کرے تو ہم نہ صرف سستے گھر فراہم کرسکتے ہیں بلکہ لاکھوں لوگوں کو روزگار بھی فراہم کر سکتے ہیں۔