غلطی انسان سے ہی ہوتی ہے، شہریار آفریدی کا ووٹ ضائع ہونے پر ردعمل

چیئرمین کشمیر کمیٹی اور پی ٹی آئی کے رہنما شہریار آفریدی کا ووٹ ضائع ہونے کے حوالے سے کہنا تھا کہ غلطی ہر انسان سے ہوتی ہے ۔

شہریار آفریدی نے میڈیا پر چلنے والی تمام خبروں کی تردید کی ہے جس میں کہا جا رہا تھا کہ وزیراعظم عمران خان نے ووٹ ضائع ہونے پر برہمی کا اظہار کیا ہے ، انہوں نے کہا کہ وزیراعظم کے اظہار برہمی سے متعلق خبروں میں کوئی صداقت نہیں ہے۔

نجی ٹی وی چینل سے بات کرتے ہوئے شہریار آفریدی کا بتانا تھا کہ جب میں نے بیلٹ پیپر کا وزیراعظم عمران خان کو بتایا تو انہوں نے مجھے ریٹرننگ آفیسر کو درخواست دینے کی ہدایت کی اور مجھے کہا کہ تم میرے سب سے با اعتماد اور وفادار ساتھی ہو تم پر رتی برابر بھی شک نہیں کیا جا سکتا۔

خیال رہے کی ریٹرننگ آفیسر نے دوبارہ ووٹ کاسٹ کرنے کی شہریار آفریدی کی درخواست مسترد کر دی تھی۔