امریکی مالیاتی فرم نے پاکستان کے دارلحکومت اسلام آباد اور معاشی حب کراچی کو دنیا کے سستے ترین شہروں کی تازہ ترین فہرست میں شامل کردیا ہے۔
خبررساں ادارے کی رپورٹ کے مطابق امریکی مالیاتی مشاورتی فرم ‘مرسر’ نے روزمرہ اخراجات اور رہن سہن کے اعتبار سے ایک تازہ ترین سروے کیا ہے جس کے تحت دنیا کے سستے اور مہنگے ترین شہروں کی 2021 کی فہرست جاری کی گئی ہے۔
روزمرہ رہن سہن کے اخراجات کے اعتبار سے دنیا کا سب سے سستا ملک کرغزستان کا دارالحکومت بشکیک کو قرار دیا گیا ، دوسرے نمبر پرزیمبیا کا شہرلوساکا سستا ترین شہر رہا جبکہ جارجیا کا شہر تبلیسی دنیا کا تیسرا سستا ترین ملک قرار پایا ہے۔
اس فہرست میں پاکستان کے سب سے بڑے شہر کراچی کا نمبر 9واں جبکہ اسلام آباد کو 11 نمبر پر دنیا کا سستا ترین شہر قرار دیا گیا ہے۔
دوسری جانب مہنگے ترین شہروں کی فہرست میں سب سے پہلا نمبرترکمانستان کے شہرعشق آباد کا رہا جبکہ ہانگ کانگ دوسرے، بیروت تیسرے اور جاپان کا دارلحکومت ٹوکیو چوتھے نمبر کے مہنگے ترین شہر قرار دیئے گئے ہیں۔
مرسر نے ان سرویز میں دنیا بھر کے 209 شہروں میں رہنے والے افراد کے 200 سے زائد عوامل پر اٹھنے والے اخراجات کا جائزہ لے کر یہ فہرست مرتب کی ہے جن میں خوراک، رہائش، سفر اور دیگر ضروری اشیاءکی قیمتیں اور ان کے اخراجات شامل ہیں۔
واضح ہو کہ اس سے قبل بین الاقوامی خبررساں ادارے اکانومسٹ نے کراچی کو رہائشی اعتبار سے دنیا کے10 بدترین شہروں میں شامل کیا تھا۔
